- 18 November 2026
SQARIM PËR PUBLIKUN LIDHUR ME FORMATIN E PËRDITËSUAR TË PASAPORTAVE SHQIPTARE
Në vijim të një lajmi të publikuar së fundmi, në të cilin pretendohet se pasaportat shqiptare përmbajnë gabime në printim, IdentiTek sqaron se ndryshimet e konstatuara në formatin e përditësuar të pasaportave nuk përbëjnë gabime, por janë rezultat i zbatimit të standardeve ndërkombëtare të përcaktuara nga Organizata Ndërkombëtare e Aviacionit Civil (ICAO).
Në përputhje me ndryshimet e miratuara nga ICAO në mars 2024, në kuadër të Aneksit 9 dhe specifikimeve teknike të Dokumentit ICAO Doc 9303, është parashikuar unifikimi i disa elementeve identifikuese të dokumenteve të udhëtimit të lexueshme nga makinat (MRTD), me afat zbatimi deri më 1 janar 2026.
Një nga këto ndryshime lidhet me kodin identifikues të llojit të dokumentit në Zonën e Lexueshme nga Makina (MRZ). Konkretisht, për pasaportat e zakonshme, kodi i mëparshëm P është zëvendësuar me PP, ndërsa për pasaportat e shërbimit kodi PS është zëvendësuar me PO. Shkronja e parë P identifikon pasaportën, ndërsa shkronja e dytë përcakton kategorinë e dokumentit.
IdentiTek ka përmbushur këto kërkesa përpara afatit të përcaktuar nga ICAO, duke zbatuar përditësimet teknike në formatin e pasaportës shqiptare që prej muajit dhjetor 2025. Që nga ky moment, janë prodhuar mbi 300,000 pasaporta me shënimet e reja, në përputhje me standardet ndërkombëtare.
Shqipëria është anëtare e ICAO-s, organizatës së specializuar të Kombeve të Bashkuara që përcakton standardet ndërkombëtare për sigurinë dhe lehtësimin e aviacionit civil, përfshirë edhe standardet teknike për dokumentet e udhëtimit dhe pasaportat biometrike.
Gjithashtu, që prej marsit 2025, Shqipëria është pjesëmarrëse në ICAO Public Key Directory (PKD) – Drejtoria Publike e Çelësave të ICAO-s, një platformë ndërkombëtare e administruar nga ICAO, e cila mundëson shkëmbimin e certifikatave digjitale të sigurisë që përdoren për verifikimin e pasaportave biometrike dhe dokumenteve të tjera elektronike të udhëtimit.
Nëpërmjet këtij sistemi, autoritetet kufitare të vendeve pjesëmarrëse mund të verifikojnë në mënyrë elektronike autenticitetin dhe integritetin e të dhënave të ruajtura në çipin e pasaportës, duke garantuar se ato nuk janë ndryshuar apo manipuluar. Kjo rrit sigurinë dhe besueshmërinë e dokumenteve shqiptare të udhëtimit, lehtëson verifikimin e tyre në pikat kufitare ndërkombëtare dhe kontribuon në parandalimin e falsifikimit të dokumenteve.
Për sa më sipër, IdentiTek sh.a. thekson se shënimi PP në pasaportat shqiptare të lëshuara me formatin e përditësuar nuk përbën gabim në printim, por është një ndryshim teknik i detyrueshëm, i realizuar në përputhje me specifikimet ndërkombëtare të ICAO-s.
Njoftimet e fundit
-
17 November 2026Kërkesë për trajnim me objekt: “Menaxhim i Projekteve”.
-
-
-
14 September 2026STATUSI I APLIKIMIT, EDHE ME SMS.
-
17 August 2026IdentiTek dhe Bashkia Berat nënshkruajnë marrëveshje
-
-
13 August 2026IdentiTek njofton numrin e ri të Shërbimit të Klientit
-
18 June 2026Thirrje për ofrues shërbimi
-
-
-
-