Pasaporta Biometrike

Të gjithë shtetasit shqiptarë kanë të drejtë të pajisen me pasaportë. Ky dokument identiteti vërteton  shtetësinë shqiptare të mbajtësit të saj, me anën e së cilës ai mund të udhëtojë jashtë territorit të Republikës së Shqipërisë. Pasaporta biometrike e Republikës së Shqipërisë është një dokument me shkallë të lartë sigurie, në përputhje me konventat dhe marrëveshjet ndërkombëtare. IdentiTek ofron personalizimin e pasaportave biometrike:

 

• Pasaportë e zakonshme 
• Pasaportë Diplomatike  
• Pasaportë Shërbimi 
• Dokument Udhëtimi  

 

Në kuadër të nismës së Qeverisë Shqiptare për modernizimin e Gjendjes Civile dhe pajisjen e shtetasve shqiptarë me dokumente identifikimi të standardit të lartë ndërkombëtar, pasaporta e lëshuar që prej majit 2009 është e formatit biometrik. Pajisja e një numri të konsiderueshëm shtetasish me këtë dokument të rëndësishëm, ishte një nga kushtet që u mundësoi qytetarëve shqiptarë të hynin në listën e bardhë të Shengenit duke filluar nga fundi i vitit 2010. Vetëm mbajtësit e pasaportave biometrike mund të udhëtojnë pa viza në zonën Shengen dhe për rrjedhojë pasaporta e lëshuar në vitin 2002 doli natyrshëm nga qarkullimi. 

Pasaportat biometrike, janë dokumente që përfshijnë chip-a elektronikë të integruar me mikroprocesorë. Ky informacion shërben për të identifikuar mbajtësin e pasaportës. Këto veçori biometrike janë një element shtesë sigurie, duke e bërë më të vështirë falsifikimin e dokumenteve.   

Pasaportat Biometrike shqiptare janë konform udhëzimeve dhe standardeve të Organizatës Ndërkombëtare të Aviacionit Civil (ICAO).

Pasaporta Diplomatike dhe Pasaporta e Shërbimit

Pasaportat Diplomatike dhe të Shërbimit lëshohen vetëm nga Ministria, e cila mbulon marrëdhëniet me jashtë të Republikës së Shqipërisë.